Ra cittara zeneize 1636/Quando, per ammorta ra sò fassinna

by Gian Giacomo Cavallo

←torna a l'èndexo

Ra cittara zeneize de Gian Giacomo Cavallo Amoî Mainæschi

Quando Maxinna per piggia l'imbatto→

Zena, Gioxeppe Pavon, 1636
In corscivo e ligatue. Gh'amanca i acenti aguççi.

Quando, per ammorta ra sò fassinna
Ro So mescia in ponente re garrette,
Che comensa à usci fuoera re barchette
A spatio chì, e lì pe ra marinna.

Amo, per fame vei cos'è Maxinna,
Se quello So con questo s'hà dà mette,
Me ra mostra assetta sciù re gierette
O trà re atre in quarche fregattinna.

Lì ò me proeva à forsa d'argomento,
Solamenti con fassera à re die,
Che ro So, chi và sotta è un So depento.

Tè mirara (ò me dixe) oura de chie,
Ti no vei là che gh'è cento per cento,
Ch'un te fà chianze, l'atro te fà rie?