Ra cittara zeneize 1636/Oura che manco asseizo
| ←torna a l'èndexo | Ra cittara zeneize de Amoî boscæsci |
Stanco da ro travaggio→ |
| Zena, Gioxeppe Pavon, 1636 In corscivo e ligatue. |
Canson Seconda.
1.
Oura che manco asseizo
Voze ro sò viaggio
Ro Só con ro Lion verso Ponente
Che ro Bosco è un Pareizo,
Che con tanto dramaggio
Ra Cigara increscioza nò se sente;
Che solo se resente
L'Oretta in ogni parte
Che oura, oura era addormia;
Vegni, Perrin t'invia,
Cara à gustane all'ombra ra tó parte
A quest'erbette in scóso,
A gove un Miserere de reposo.
2.
A che con tanta gora
Se crucia, e se travaggia
Ro Mondo à proeo à tenti pensamenti?
Se ro spasio d’un'hora
Ansi un fuoego de paggia
Se ne porta con lé ri nostri stenti?
Cruoevan ri morimenti
In duoi parmi de fondo
Ancuoe sotto ra chiappa
Tá che à serviro in cappa
C'heri à capiro non bastava un mondo
E in duoi bági de Galli
Tá è scientou, chi dava heri ri balli.
3.
Lichinna, ò quanto è megio
Largo da re Cittæ
Fá vitta intri boschetti à ra verdura
Chi, e lí fáse spegio
Dri laghi innargentæ
Letto dell'erbettinna dra chianura
Atro studio, atra cura
No cová dentro peto
Nò portá drento ascoza;
Solo chiaga amoroza
Fæta da ro sò Donna per despeto,
L'Oro, chi pá ro chiue
Mettero trà re Indie perdue.
4.
Oh' che vitta felise
Solo come l'oxello
Sott'un costo sarvægo retirou
Passá l'hora infelise
A son dro sigorello
Resonando ra Valle, e ro Fossou.
Là mira pe ro proù
Re pegorette insemme
Fá trà ló mille axilli
Chì responde ri grilli
In muoeo de regatta tutti assemme;
Odí ro ventixuoé
Fá gorgia à ro cantá dri Rossignuoé.
5.
Vegni donca à fá pruoeva
Sens'aspetá chiù preghi
Cara de gusti, e gioie si compie
Chì d'onde oura ri pruoeva
Mà pero manco intreghi
Perrin per nò trovateghe oura tie;
Re scioi, chi son svampie,
Tosto rente à seccase
Pe ro cado dro Só,
L'ære chi è tutta Amó,
Tutte t'aspetan per insuccarase,
Mà chiù Perrin, chi hà in gritta
Chi hà in odio senza tì tosto ra vitta.
6.
Canzon, và ti assì, prega, e sconzura
Buoettateghe à ri pè,
Chì sà se ti tornassi ti e lé?