Prose rimæ/Loritto ò o Papagallo de Moneghe/Prefaçion
| ←Torna a l'endexo | Loritto o ô Papagallo de Moneghe de Prefaçion |
Parte primma→ |
No voendo fâme ûn merito de penne do pavon,
Mi creddo necessaio de fâ ûnn-a confescion:
O fondo de sto comico racconto, o mæ o no l'é:
Ma do Vert-Vert, do classico poemetto de Gresset.
Mì, dell'idea servindome, o fæto ho ûn pö ingrandïo.
Gh'ho azzunto di accessorï, gh'ho dæto ûn atro gïo;
Forse l'ho reizo anemico, avendolo allungôu,
Çerto, che no m'immagino d'aveilo migliorôu;
Oltre che a frase e o spirito do classico françeize
No l'é çerto poscibile de rendilo in zeneize,
Bezêugna aveì da mutria, pe ûn aze comme mì,
De mettise a fâ a scimmia a quella gente lì.
Dunque o dicciaro sûbito, trattando st'argomento,
Non ho creddûo fâ ûnn'opera de lena e de talento,
E tanto meno, mettime in riga e pretenscion
D'ëse piggiôu da-o pûbblico pe poeta se nô son.
Solo coscì pe spazio, piaxendome l'idea,
Trovando o fæto comico, ho immaginôu che gh'ëa
Materia de poeì rendilo oggetto de demôa,
Quando se vorta l'anima pe passâ presto ûnn'ôa,
Aoa che s'é in t'ûnn'epoca, che se no gh'é ciû i sbiri,
Gh'é invece ûnn-a faraggine de poeti in elzeviri,
De giambi, d'odi barbare, de distici e trochei
Che a sä roba boniscima, ma a sciûga i zebedei,
Figûæve che abbominio! pensâ che sacrilegio
O sä scrive in vernacolo secondo o moddo vegio!
Ma mì che ho l'abitûdine de dâghe zù all'ingrosso,
E-e tavernelle a-o proscimo, sciûgâ meno che posso,
Che creddo pe prinçipio che ûn pö de bon ûmô
O seggie ciû benefico che a scienza d'ûn dottô,
Non ho tegnûo pe regola ne-o scrive sta poexia
Che de çercâ ûn antidoto contro a malinconia;
Perciò ninte de classico, d'astrûzo e de speciale,
Ma ûn fæto sempliciscimo, descrïto a-o natûrale,
In moddo che lezzendolo, seggiæ in to stesso ambiente
De cöse e de individui coi quæ seì, giornalmente,
Che insomma o vostro spirito o no s'accorze manco
De cöse o leze, e all'ûltimo o no se trêuve stanco.
Ghe sö riuscìo? Speremmolo, ad ogni moddo questo,
L'é quanto me dexidero, veddeì che son modesto;
Per mì, tanto l'é o mæximo, restiö quello che son,
Qualunque seggie l'exito, da mæ compoxizion.