Propoxiçioin a-o Conseggio di Ançien/Propoxiçion contra o troppo moscezzo 1449

←torna a-i atre propoxiçioin

Propoxiçioin a-o Conseggio di Ançien Contra o troppo moscezzo, 7 mar. 1449

Zena, Arch. de Stato., Cod. Diversorum Jacobi de Bracellis X. 978, ann. 1449 - ed. da L.T. Belgrano, "Della vita privata dei Genovesi", 1875

Segnoi, voi sei demandae cocì per cosa la qual toca grandementi a lo honor de De e a la conscentia e a la fama vostra e de tuta questa citae, e brevementi a lo universal bem de ogni homo; per le quae raxoim voi avei a intender bem quello chi se proponne, e a conseiar saviamenti la materia de la quale se de' parlar. Voi vei tuti quanto abuso e excesso se comette ogni jorno pù in li superflui vestimenti et ornamenti, principalmenti de le done; sum la qua dannosa e pocho savia speiza lo illustre meser lo Duxe e questi magnifici segnoi Antiaim ham spesso avuo monte exhortation e preghere de volei provei ; arregordando tae personne che questa inutile pompa monto despiaxeiva a De, era contra ogni moralitae e virtue, adduxeiva ruinna e destruction a monti in particularitae e generalmenti a tuta la citae; era caxum che monti o rumpissem o feissem contracti illiciti e mille atre peccae per poei mantegnì questi inutili superchi. Poiva etiamdè intender ogni homo de mezzam intellecto che redugandose a stao moderao e honesto, grande quantitae de monea, la qual se tegneiva morta e occupà in vestimente e joie, convertandose in mercantia poiva addur graindi fructi e grainde utilitae. Arregordavam etiandè che li nostri antecessoi li quae de vera virtue e de magnanimitae valeivam monto meio cha noi, come le lor victorie e conquisti demonstram, e li quae guagnavan monto pu lengeramenti cha a lo tempo de adesso, persochè lo mundo era monto meio disposto a la mercantia che ello non è aora, mae no se lassam precipitar in questa pompa; ma più tosto seando li guagni monto graindi e le altre speize assae moderae, stem sempre contenti de vestimente utile e honeste e remote da ogni pompa e reprensium; perchè par anchora esser maior la ignorantia nostra che seando li guagni e piceni e cum grande stento e perigo, noi spendiamo cum si poca consideratium in cose vane e de nisum fructo. Cum le quae exhortatioin e raxoim questi tae pregavam lo illustre meser lo Duxe e questi magnifici segnoi Antiaim che elli se volessem desveiar e provei a così manifesta destrutium de la citae; la qual chi altramenti no l'avesse inteiza saltem la poiva intender in li pochi parentae chi se eram faeti da alchuni agni in sa, la qual cosa no seguiva se non per le excessive speize. Lo illustre messer lo Duxe e questi magnifici segnoi de Conseio non se sum volsui mover a far alchuna provixiom o remedio fim a tanto che elli no ham inteizo cum che vie se deveiva provei che se observasse quello chi se feise; persochè elli cognosceivam bem che far leze contra questo abuso e no servarle era monto pezo cha non farle. Ma possia de longhi e vari pensamenti, paerando a lor che lo remedio de la observantia se troverà, non ham volsuo haveir a Dè e a mundo questo carrego, che seando exhortae e pregae elli non se movan a far le provisioim necessarie. E intendando lor questo tocar universalmente a tuta la citae, ve ham volsuo odir e intender, e haveir lo conseio vostro avanti che se proceda più oltre. Voi avei donca a conseiar se a voi par ben che elli provegan contra tanti excessi segondo che parrà a le Segnorie Soe o a quelli a chi lor la commetteram, o che se lasse la cosa in bando e se patissa visibilmente la destrutium de la citae.