Poexie zeneixi do Feliçe Santi/A scignôrinn-a Delfin
| ←Comme d’ötôbre... | Poexie zeneixi de A scignôrinn-a Delfin (a Romma) |
Brindando→ |
O sö, câ scignôrinn-a, che, complimenti a parte,
Sciâ lè ûnn’intelligente; sciâ prediligge l’arte;
E, invece de mâveggia, me fà compiaximento,
Che sciâ descrive Romma con tanto sentimento.
L’hö lètta e torna lètta a câ sö letterinn-a;
A rilezieivo sempre! — Sciâ o credde, scignôrinn-a? —
A mæ famiggia, quindi, dôçe a ghe fa prescion,
Perché sciâ ghe prosegue a sö bella descrizion.
Ghe parlieivo de Zêna, ma — dæti sti momenti —
No se sente che tacchi, giastemme e sacramenti!
E dönne, pe fâ a speiza, son tûtte meze matte,
Perché no trêuvan d’êujo, de pasta e de patatte,
Sciâ s’immagînn-e dunque che ciæto, che malanno,
Ghé stæto pe Natale, e pöi pe-a fin de l’anno!...
Atro che do pandôçe, säçissa e maccaroin!...
Atro che ravioletti, che tregge e che cappoin!...
A mizêia — a s’avanza e a scöre l’allegria:
Personn-e, câse e stradde, cangian fisonomia!
Chi gh’a a pixon de casa e chi sö figgio in goæra:
Chi arrovinôu lé stæto da questo særa særa!...
Ma basta!... E sciâ perdonn-e 'sto sfêugo do momento!...
Mi spero, ûnn-atro vötta, de scrîve ciû contento,
Pe dîghe che i tedeschi l’emmo acconsæ da-e fèste;
Che l’emmo mandæ via da Sciûmme, Trento e Trieste!...