Poexie do Gioxeppe Peagallo/Pe ûn spozalizio
| ←O Diao chi va a tentâ S. Françesco | Poexie de Pe ûn spozalizio |
Due paole a-i Ciavæn→ |
Pe ûn Sposalizio
Lascemmo ä parte
O tac e l’oui,
Voemmo dî solo;
Scì, Signorscì.
Questa a l'é a lengua
Che intendan tûtti,
Che intendiæ finn-a
I sordi e mûtti;
Questo o l'é o moddo
De parlâ ciæo,
O veo Zeneize
Zù-a riso-ræo.
Dï: jà, jò, tac
A ûn orso, a ûn can,
Scàppan dä puïa
Finn-a doman;
E han fæto ben
Spozôu e Spozâ
Quando sentindose
Interrogâ
Se son contenti
De dî de scì,
Presto han risposto:
Scì, Signorscì.
Se rispondeivan
O tac, o jà,
Se ghe sæ dito
Andæ a spigoâ.
E l'è per questo
Che mi hò vosciûo
In lengua patria
Fâghe ûn salûo,
E che ghe vêuggio
Pregâ da-o Çê
Benedizioin
Da capp'a pê.
Primma de tûtto
Prego o Segnô
Che stagghe a paxe
Sempre con lö;
Che ûn solo séggian
Spirito ûnïo
Comme due cömbe
Ne-o stesso nïo;
Allegri sempre,
Sempre contenti,
Senza discordie,
Senza lamenti;
Che ne-a sò casa
Ghe ciêuve in grande
Dinæ e salûte
Da tûtte e bande;
Che ne-o Negozio
Do Sciô Carlin
Sempre de gente
Ghe segge pin,
Tanto che a roba
Presto a tabacche,
Se guägne mutte
E s'impe e stacche.
Cose hò da azzunze
De ciû, Spozoeì?
Se ancon contenti
De mi no seì,
Ve preghiö vitta
Pe çentêutt'anni,
Senza maottïe,
Senza malanni,
E pe rescioäve
De vòtte o chêu
Unn-a dozzenn-a
De boin figgiêu.
Ma sorvetûtto
Prego che Dio,
Che e Vostre Nosse
Ha benedîo,
Sempre o ve dagghe
Consolazioin,
E o ve continue
Benedizioin;
Coscì saei sempre
In allegria,
Comme seì aoa,
E coscì sia!