Poexie do Gioxeppe Peagallo/Lamenti do Diao Zorzigan
| ←Un Generale e ûnn'Aquila | Poexie de Lamenti do Diao Zorzigan ne-o vedde o Diao Asmodeo ligôu da S. Raffaele in ti deserti d'Egitto |
Pe-a partensa de P→ |
LAMENTI
DO DIAO ZORZIGAN
NE-O VEDDE O DIAO ASMODEO
LIGOU DA S. RAFFAELE
IN TI DESERTI D'EGITTO
Ve o là o mæ primmo
Amigo vëo,
O mæ cameadda,
O mæ Asmodeo;
Me sento moî
Solo d'ammiäo:
Ah pöveo diäo!
Ah pöveo diäo!
Miæ quelle corne
Ch'ëan coscì belle!..
Son tûtte rotte,
No son ciù quelle;
L'é streito i êuggi
Ch'ëan sensa päo:
Ah pöveo diäo!
Ah pöveo diäo!
Quella bocchetta
Chi v'innamoava
Quando a taxeiva,
Quando a parlava,
Aoa a pä quella
De mæ bezäo:
Ah pöveo diäo!
Ah pöveo diäo!
E quella côa
Che nêutte e giorno
Pomposa e lunga
O giava intorno,
Aoa a l'é meno
Che a côa d'un gnäo:
Ah pöveo diäo!
Ah pöveo diäo!
Primma o l'aveiva
Destressa e forsa,
Aoa o no pêu
Manco andâ all'orsa;
E o l'anscia, o langue
Sensa ripäo:
Ah pöveo diäo!
Ah pöveo diäo!
Se se trattava
De tentâ i ommi,
De rende birbi
I galantommi,
Nisciûn riûsciva
A superäo:
Ah pöveo diäo!
Ah pöveo diäo!
Oh quante votte
Hò zugôu insemme
A chi savesse
Dî ciù giastemme!
E n'ho posciûo
Manco eguagliäo:
Ah pöveo diäo!
Ah pöveo diäo!
Ma cose serve
Ch'o segge asperto,
Se l'han ligôu
Chì in to deserto?
Se in nisciûn moddo
Posso aggiûttäo:
Ah pöveo diäo!
Ah pöveo diäo!
Ah no me saeiva
Mai ciù assûnnôu
De vedde ûn Diäo
Incadenôu;
De collâ, questo
Boccon amäo!
Ah pöveo diäo!
Ah pöveo diäo!
Bello Asmodeo,
Pommin d'inferno,
No me stacchiö
Da ti in eterno,
Te baxiö sempre,
E te fö cäo:
Ah pöveo diäo!
Ah pöveo diäo!
S'ea tò ne-i giorni
Che trïonfavimo
E a gente in spalla
Lazzù portavimo,
Vêuggio ëssilo aoa
Che cangia a festa:
Ah pöveo diäo!
Ah pöveo pèsta!