Piaggio M. - Poesie 1846/Varietæ/Sûnetti/Riçetta pe fâ i Raviêu
| ←A-e Campann-e | Sûnetti de Riçetta pe fâ i Raviêu |
A Torta Pasqualinn-a→ |
| (ediçion Pagan - 1846) |
Sûnetto.
Recipe ûn bello pesso de vitella
Da mette a rosto per fâ ûn bon tocchetto;
Recipe da tettinn-a, ûnn-a çervella,
Laccetti, poca môula, e assæ do fietto;
Recipe da buraxa fresca, e bella,
Cuccoîn de pulla freschi, ûn retaggetto
De säsissa da amixi, e ûn pö de quella
Prescinsêua de Paiscion passâ a-o siassetto:
Misce et Remisce ben ciù che ti pêu
Omnia confusim drento in to mortâ,
Et extende de pasta ûn gran lensêu;
Fanne de ballettinn-e cö cûggiâ,
Applica, crêuvi, taggia, son raviêu
Da chêuxe, et tamquam pilloe da collâ.