Piaggio M. - Poesie 1846/Varietæ/O qui pro quo
| ←Spiritositæ | Poexie de O qui pro quo |
Disgrazia e Fortûnn-a→ |
| (ediçion Pagan - 1846) |
Un Rettô zà ûn pö buscetto,
Dilettante do fiaschetto,
O l’andò da-o formaggiâ,
S’accattò da carne sâ;
O se a misse sotto o brasso,
E secondo l’ordinajo,
O l’andava a lento passo
Mastûgando o so breviajo.
Arrivôu ch’o fù ä cascinn-a,
Drïto drïto o va in cuxinn-a,
Scrêuve, e bêutta pe astrazion
O breviajo in to cädion,
E se mette a carne sâ
In ta stacca da sottann-a,
Sêunna i ciocchi da campann-a,
O va in Gexa pe öffiziâ;
All’odô de quello lardo
Ghe va apprêuvo ûn gatto bardo,
Un porchetto c’ûn barbin,
Tûtti i gatti di vexin,
E con quella compagnia
O va primma in secrestïa,
Poi va in cöu per prinçipiâ
O se mette in stacca a man,
O se sente tiâ ûnn’arpâ,
Buffâ ûn gatto, bajâ ûn can.
Solo allöa poveo Rettô
O s’accorze do so errô,
O tornò in casa mincion
Con a stessa comitiva
A levâ d’in to cädion
O breviajo chi buggiva,
Che o fè ûn broddo tanto grasso
Da levâghe o lardo a sguasso.