Piaggio M. - Poesie 1846/Varietæ/L'Ommo in mëzo a due Donne
| ←A Serenata | Poexie de L'Ommo in mëzo a due Donne |
A Sciortïa da Casassa da Mænn-a→ |
| (ediçion Pagan - 1846) |
Gh’ëa ûn Sciö de mëza etæ,
Co-i cavelli zà scangiæ,
Ma però ben conservôu,
Grande, grosso e ben ciantôu,
O pensava fra de lê
De doveì piggiâ moggê.
Fra e Scignöe che o conosceiva,
Due viduette o distingueiva,
Unn-a zovenetta assæ,
L’atra quæxi da so etæ;
O e andava cortezzando
Giorno e nêutte in casa sò,
Quelle andavan garezzando
Pe innamoâlo, e fâseo sò,
L’accaezavan ciù che poeivan,
L’acconzavan comme voeivan,
Ma a ciù vegia a gh’arrancava
I cavelli che a veddeiva
Neigri, l’atra a ghe streppava
Tûtti i gianchi che a çerneiva;
Leva anchêu, streppa doman,
O peòn pezo che ûn can,
E de grixo comme o l’ëa
Ghe restò ben presto a sûcca
Netta comme ûnn-a testëa,
Che o dovè mette perrûcca.
Ma lê in veddise coscì,
L’intenzion o l’accapì,
E o ghe disse: basta, amighe,
No ciù guæra, bonn-e fighe;
M’eì zà peôu quant’eì vosciûo
No me vêuggio ciù majâ,
V’ho abbastanza conosciûo;
Me vorriesci comandâ!
Vêuggio vive a moddo mæ;
Repiggiæve o vostro amô,
Vä ciù ûn pö de libertæ
Che quant’öu ascädâ o Sô;
Andæ a peâ ûn atro cappon,
Mille grazie da lezion.