Piaggio M. - Poesie 1846/Varietæ/L'Etæ de Donne
| ←O Villan giûdizioso | Poexie de L'Etæ de Donne |
O Desgûsto→ |
| (ediçion Pagan - 1846) |
Passa i anni comme o vento,
Se ven vëgi in t’ûn momento,
Mi n’ho tosto quarant’ûn
Perchè ogni anno ne cresce ûn,
Cösa che capî no vêu
Çerte Donne a-o dì d’anchêu
Che fan sempre da Figgette,
E han ciù rûghe che e fädette;
A propoxito d’etæ,
(Parlo a voî Donne assennæ)
Vêuggio dîve ûnn’istorietta,
Chi è sûccessa giorni son
A Mammà da Sciä Pimpetta,
In ta sò conversazion,
Donna che a fâghe piaxeì
Çinquant’anni a deve aveì,
Ma che a forza de belletto,
D’inciastrâse de rossetto,
E d’andâ sempre attillâ
Per Puponn-a a vêu passâ;
Ne-a sò veggia brillantiscima,
D’Ommi, e Donne abbondantiscima,
De Narcisi spaximanti,
E de Veneri galanti,
Doppo aveì secondo o solito
Dito i cæti da Çittæ,
Vegne a mëzo (caxo insolito)
O discorso in sce l’etæ;
A Sciä Netta a l’assegûò
De n’aveì trent’anni ancon,
Ma sò figgio a se scordò
Chi partì ne-a coscrizion;
Vintisei disse a Sciä Giggia,
Ma n’aveiva ciù sò figgia;
Un de meno a Sciä Gioanetta,
Ma a perdeiva a perrûcchetta,
A Sciä Comba madonnava
Che i trent’eûtto a no passava,
A Sciä Giûlia desdentâ
Che ciûveiva in to parlâ,
Ghe scappò ma con piaxeì,
Ch’a n’aveiva trentetreì,
E de tante che ghe n’ëa
A ciù vegia a confessò
D’ammortâ appenn-a primëa;
Chi chinz’anni s’ammermò,
Chi quattorze, e chi dixêutto,
A ciù sccetta poi soli êutto;
Ghe restava a ciù puponn-a,
A Sciä Lilla, cioè a Patronn-a,
Doppo fætase pregâ,
E ciù rossa diventâ,
A sbraggiò comme i figgiêu,
Ne compiscio trenta anchêu.
Lì scappò ûn scciûppon de rïe
In sentî a moæ de böxïe,
Chi toscì, chi se spûrgò
E chi o naso se sciûsciò:
Se trovò in conversazion
O Sciö Checco ommo bûrlon,
Cöse gh’è (o disse) che rieì?
Sci Scignori, a i deve aveì,
Perchè son ciù de vint’anni
Ch’a me o dixe tûtti i anni.
Donne cäe non v’arraggæ
Se ho contôu queste veitæ,
Ma ghe n’è pe-i Ommi ascì,
Ne conoscio tanti mi
Ch’ëan zà vëgi, e mi piccin,
E fan sempre i pupponin:
Van lö ascì tûtti attillæ,
Pin de mosco e de pomæ,
Perrûchin ben pëtenôu,
Fan l’amante spaximôu;
Quando pêuan, con tûtte e Belle,
Ghe rincresce ûn pö e bertelle,
E... ma è tempo de finî,
Che ghe n’ho tante da dî;
Un’atro anno v’appattiö,
E in sce lö ve divertiö.