Piaggio M. - Poesie 1846/Prefazioîn e Reviste da Çittæ/1843
| ←Prefazion, Anno 1842 | Prefazioîn e Reviste da Çittæ de Prefazion, Anno 1843 |
Revista, Anno 1843→ |
| (ediçion Pagan - 1846) |
*
E coscì?... comme a l’è andæta?...
Dov’o l’è o Quaranteduî?...
A sordonn-a o se l'ha fæta
Senza poeilo ciù tegnî....
O scappò comme i so Fræ
Ne l’abbisso di Passæ!...
O n’ëa manco prinçipiôu,
Ch’eiveo chi zà terminôu,
E zà misso in ti scordæ!...
O l’è dûôu, me pâ, ûn momento....
Passa i Anni comme o scento,
E coscì d’in anno in anno,
Figgi cai, s’incaminemmo
Verso o nostro Dixinganno!
E ben poco ghe pensemmo....
No tocco aoa sto Cantin
Per no fâ Malinconia,
O sûnniö da chi a ûn pittin:
Stemmo dunque d’allegria,
Perchè o quondam sciô Anno vegio
Primma de parti o l’hà dito
Che.... O Quarantetreì sä megio
De Lê assæ... anzi o l’hà scrito
In t’ûn Fêuggio de Cartinn-a
Sigillôu comme ûnn-a Lèttea
Con l’addresso ... A-o Sciô Reginn-a
Proprie mani... Zena et çettea ...
Che ve o vaddo a lëze presto.
Ecco chi o preciso Testo
De sto Scrito, a ûzo gallinn-a,
Tûtto pin de Scassatûe,
De Zuntette e Puntatûe,
Che, cö Preambolo lasciôu,
O l’è coscì prinçipiôu:
No ghe sä ciû Dissenscioin,
Nè Preteize, nè Ambizioin;
Un Disarmo generale,
Paxe a-o Mondo ûniversale,
O Commercio decadente
O vegniä torna fiorente;...
E Speculazioîn bazæ
Un pö megio che e Passæ;
I Affari boin cresciûi,
Guagniän Tûtti di gren scûi:
No ghe sä ciù Scottatûe,
Ne mâ inteiso Movimento
Per Notizie fâse avûe;
Terminiän tante Rottûe
Co-i Marviaggi a salvamento;
Confidenza rinasciûa,
Diffidenza andæta in pûa;
Se porriä di Fidi fâ
Senza ciù pericolâ...
Circoliä sempre o Contante
E o vegniä regorgitante;
Posscidenti imbarassæ
Pè impiegâ i so Capitali;
Banchê nêuvi improvisæ
Con Dinæ e bonn-e Cambiali;
Portofranco, e Magazin
D’ogni Mercanzia strapin;
Sutterfûgio smascherôu,
Manipolio deportôu;
L'Usûrajo, e i Arpagoin
Convertij e vegnûi Largoin...
Regniä sempre a Correntezza,
Bonn-a Fede e Precizion,
A Façilitæ, a Lindezza,
A Prûdenza e a Discrezion...
Scentian quelli tanti Abûsi
Distrûttoî d’Arti e Mestê,
Ritornando ai pristini Usi;
No spontiä d’ogni misê
Da per tûtto Sensæ intrûsi
Per fâ e ficche impûnemente
Ao Legale Vegio Agente;
Terminiän Tûtte e Ganciaje,
E finiän Tûtte e Fûrbaje...
Indûstriosi d’ogni Genere,
Giornalisti, Arlieri, Etcettera,
Mai Oziosi, e sempre in Opera.
Travagiän, guagniän, mangiän,
Se spazziän, spendiän, spacchiän;
E i Camalli?... camalliän.
Segue poi questo Capitolo
Misterioso, e ûn pö ridicolo:
Abbondanza assæ de Gran,
A bon prexo e grosso o Pan...
(Grosso è scrito ciù piccin);
Un’Annâ doggia de Vin
Gianco e neigro, sccietto e bon..
(In to sccietto gh’è un scasson);
Grand’Annâ d’Eujo schillente
Da Levante e da Ponente,
Che frizziän Tûtti a bezæffe...
Con træ Zitta e con quattr'Æffe);
I Legûmmi in Abbondanza ...
(Gh[']e levôu, con Duî de pansa);
E Castagne no manchiän
(Chi gh’è azzunto, se cazziän);
Raccûggeita senza fin
D’Articiocche e de Limoin
Arranchæ de sprescia a reo
Per caxon... (ghe pâ, do zeo);
Bazajotti, Bûtteghæ,
E chi vende in generale,
Intrêuggiän di gren Dinæ
Pè exitâ Mercanzia Reale,
E guagniän senza spellâ...
(Chi gh’è tiôu sciù ûnn-a penâ);
Mezûïan con precisûa
Sempre giûsto... (Rascciatûa);
E peziän con diligenza
Scrupulosa... (Reticenza);
I Magnifichi restiän
Sedentarj in te Speziaje
A contâ de Mincionaje;
Ciù riçette no scriviän
Per mancanza de Maottïe,
E Gazzette contentiän
Per accrescighe e böxïe;
I Speziæ co-e moen in man
A scciûppûsene da-o rïe
Senza ciù frûstâ e Bänsette
Con Pûrganti e Vomitivi
E angosciose Pittansette...
(Çinque Punti Eselamativi);
I Dottoî con i Procûoeì
N’arvian ciù Libbri e Sganzïe
Avian sempre da taxeì,
Perchè e Liti sän finïe;
S’aggiûstiän i Litiganti....
(Sætte Punti Interroganti);
I Legali, co-i Cûriali
Ciù de Toghe no frûstiän,
Serriän Tûtti i Tribunali
E in... Vilezzo se n’andiän;
I Portê, Uscieri, e Sattelliti
Se i pappiän oziosamente,
E i Scriven con tûtti i Zuveni
Scarbocciän eternamente.
E chi seguitâ ûn Appostrofe
Ai Zugoeì de tûtti i Abiti
Da cantâghe, scrita in Mûxica
Con Inciostro rosso-cremexi,
Meno i Tappani negriscimi,
In Ton grave e assæ patetico,
Tempo perso! et ad libitum.
Basciettanti?... Goffezzanti?...
Do Maccâ gren Dilettanti?
E ostinæ Biribiscianti?...
Lasciæ presto o vostro Vizio,
Emendære, aggiæ giûdizio,
Che con sempre continuâ
Giorno e nêutte de Zûgâ
Perdieì sempre a preçipizio!...
Portieì do gran pregiûdizio,
E Disgûsti assæ ae Famiggie!
Trasandieì Negozj e Impiego,
Ve trovieì presto in te sbiggie!...
Perdieì Fäma, Onô e Dinæ,
Ghe vorriä Mëxinn-e e Mëgo,
Ghe lascieì a Sanitæ!...
E arraggiæ pezo che i Chen,
Senza aveì ciù ûn pö de Ben,
Irrequieti e spaximanti,
Senza poetve tiâ ciù avanti,
Consûmmæ da-i dispiaxeì,
O Gran Zêugo terminieì
Con finî pe ëse BIRBANTI!!!...
E chi seguan marcatisscimi[sic]
Vintiduî Punti esclamanti,
C’ûnn-a corba d’Ettecettera,
Co-i quæ termina a Profetica
Manoscrita Cartapecora.
Vorriæ azzunzighe do Mæ,
Per parlâ, e moralizzâ
Sorve o Tempo, in scie l’Etæ,
E in sciù[sic] Cianze e o Tribolâ
Da soffrente e bersaggiâ
Povea nostra Umanitæ...
Mà ciù prolungâ no vêuggio
A zà lunga Prefazion....