Piaggio M. - Poesie 1846/Prefazioîn e Reviste da Çittæ/1840
*
O comme passa - i anni presto!...
Và, Trentenêuve, - che ti è zà lesto...
No se n’è visto - nè in man nè in bocca!....
Vegni, Quaranta, - che a Ti te tocca;
Intra, e o Cattivo - lascia dä porta,
O Bon, e o Bello - solo a noî porta,
Per dä prinçipio - ä to Dexenn-a,
Con bôin auspizj - da Quarantenn-a;
Ma primma lascime - fâ ûn pö d’abbosso
De to Fræ andæto, - coscì all’ingrosso:
....
Nei primmi meixi - o ne fe’ puïa
Con minacciâne - de carestia!...
Crescendo andava - de prexo o gran,
E se vendeiva - piccin o pan!
D’Uive, dixeivan, - che no ghe n’êa,
Cheite pe-a camoa - tutte, in Rivêa!...
Vin gianco e neigro - tûtto scentôu
(A Zena, e fêua - meno o tempeôu!)
I Coloniali - zà scarsezzavan
Pe-i Scciavi liberi, - che all’ozio stavan!
Doveiva i generi - tûtti aumentâ,
Cresce i bezêugni, - mancâ o dinâ!
Chi preveddeiva - presto ûnn-a guëra,
A chi mancava - de sotto a tëra!
Sperava o fûrbo, - zà d’inricchî,
Temeiva o semplice - d’impoverî!
All’indûstrioso - batteiva o coêu,
Zà i Poæ sospiavan pe-i so figgiêu!
Ma tanti dûbbj, - e tante puïe
(Laudando Dio) - son poi svanie,
Chè fêua o gran cädo - da rostî, ä Stæ,
L’ægua d’Autûnno, - fiûmmi sbocchæ!!
E meno l’êuio - ùn pö mancante
(Cresciûo ne-i trêuggi - do Speculante),
De tûtto o resto - ghe fù abbondanza;
Ghe fù de Guëre, - (ma in lontananza);
De mercanzie - n’arrivò in grande
Per mâ, e per tëra - da tûtte e bande.
Ghe fù di Incendj, - de inondazioîn.
Di Terremoti!... - (ma non vixin),
Naufragj orribili, - mortalitæ,
Vapori all’aja!... - (ma lonxi assæ).
Ghe fù mancanza - grande de gran!
(Ma mille miggia) - da noi lontan.
Nisciûn de famme - (che saccie) è morto,
E semmo tûtti - arrivæ in Porto,
Meno i partij - per l’atro mondo
Contro sò vêuggia!... e chi rispondo
Che quando sêunna - quella fatale,
Inevitabile - nostr’OA MORTALE,
No serve i titoli, - no vâ i dinæ,
Virtù, bellezza, - manco l’Etæ!
Pe-a troppa Cûa, - pe-o poco Fâ,
Fra i Meghi e i Recipe - besêugna andâ!!...
.....
Sgraziatamente - o Trentenêuve
O ne n’ha dæto - de forti prêuve!
Oh! quanti Ricchi - e Dignitaj,
Plebei e Nobili, - Fin e Ordinaj,
O l’ha cacciôu - senza ordinanza
Ne-o gran Cadeon - de l’Eguaglianza!...
Quanti desgûsti! - quanti desmûi!
Quante allegrezze! - e quanti lûi!...
Famiggie in lagrime - e in perdizion!
Eredi in gioja, - e in pretenscion!
Restò ûnn-a lappide - per l’opulente,
E ûn Çimitejo - per o pessente!!...
....
Ma Ti, Anno Nêuvo, - dimme, ti è megio,
O forse pezo - de l’Anno Vegio?...
Ah!... se a Tiaquattro - te veddo andâ,
Un bon pronostico - ne devo fâ:
Da quelli rammi - d’uivo e de palma,
Ghe veddo a Paxe, - e o mondo in calma;
In quello corno, - tûtto fragranza
Pe-i Cöri e i frûti, - lezo abbondanza;
Fra quelli colli, - sacchi e pappê
Fiorî ghe veddo - arti e mestê;
Da quelle bänse - equilibræ
Veddo a Giûstizia - trionfâ, e a Veitæ,
Quello Staffî - che in man te pende,
A Virtù oppressa - saviä difende;
E quella Clava - colpî a saviä
Chi l'Innocenza - sedûe vorriä!
....
Zà, quelle Rêuze - son pë Spozæ,
E quelle Spinn-e - son pe-i majæ,
Quelli Pappavei - son pe-i potrôin,
E quelle Pigne - pe-i avaröin;
Quell’erba diafana - pe-i Magistrati,
E quella anfibia - pe-i Avrocati;
Veddo a viscosa - per l'Intrigante,
E per chi littiga - quella pûrgante;
Pe-i letterati - pochi Melôin,
E tutte e Sûcche - pe-i Battestôin!...
....
Chi è quello Vegio - con lunga Sappa?...
O l'è o prezioso - TEMPO che scappa!..
Presto, affermælo, - tegnî i cavalli,
Piggiâghe i baûli - fito, Camalli!...
Oh comm’o cöre! - o pâ infûriôu...
Nisciûn l'acciappa... - o l'è Scappôu!!!