Piaggio M. - Poesie 1846/Prefazioîn e Reviste da Çittæ/1838
*
Finalmente, graziadio,
Trentesette ti hæ finio!
E se pêu cantâ o Teddeo...
Vanni, vanni, che ti è stæto
Un annetto ben da reo?..
Tanto freiddo ti n’hæ dæto
Co-i giassæ to fenoggetti,
Che ciù ûn pö moimmo sciorbetti!
Ti hæ imprestôu a to Sappetta
Per Messoïa ä Sciâ Cicchetta
Che a servì per fâne lippa,
Giorno e nêutte in te l’andâ,
Obbligandone a passâ
Quæxi tûtti sotto o Grippa
Chi ne voeiva fâ a bûrletta
D’acciappâne pe-a lûnetta
E strangoâne per caitæ,
Dunque fâne moî svenæ
Senza manco dî ciù ûn ætte!...
Vanni, vanni, Trentesette,
Cöri, e dagghe ben di pê
Senza giâte ciù inderrê...
Anno fâso, anno da chen,
Abbondante d’ogni mâ,
E mancante d’ogni ben!....
Generoso in regallâ
Neivi, giassi, venti, turbini,
Terremoti, oraghen, fulmini,
Peste, incendj, inondaziôin,
Da gragnêua comme i briccocali
Cö sconquascio de stagnôin!...
Sarpa l’àncoa, e metti veja,
Anno senza Primmaveja!
C’ûnn-a Stæ cada bugia
Da creppâ tûtti dä peja
E spellâ d’angoscia e puia!
Vanni, vanni a to marviaggio,
E a semenza porta via
Dell’axiatico contaggio,
Che o no posse ciù tornâ
Tûtti i anni a vendegnâ!!
Vanni, vanni, coso cäo,
Curri fin che ti pêu andâ,
E magara a cà do diäo,
Che nisciûn se pêu scordâ
O tò Inverno interminabile,
Micidiale e insopportabile!
Co-a to maledetta Stæ
Chollerosa, inesorabile
Che colpin, ricchi e despeæ,
D’ogni sesso, d’ogni etæ,
D’ogni stato e condizion,
E cacciòn senza pietæ
Ne-o Cadeon dell’Eguaglianza
A sapienza e l’ignoranza,
O cattivo insemme ao bon!!...
Anno infame, e mascarson!
Quante vittime o l’hà fæto!
Quanta gente se n’è andæto!
Quante perdie!!... ma parlemmo
(Che l’è megio) d’allegria,
Dunque, amixi, s’aggrippemmo.
Osservæ ûn pö l’Anno nêuvo
Co-i Speggietti, chi n’ammia?
Miæ che bello frontispizio?...
L’Abbondanza ghe và apprêuvo
Co-a Giustizia, bon indizio!...
Ferma, ferma per caitæ!
Cäo Trentêutto, no corrî,
Duzze meixi stà con noî
Poi te dæmo a libertæ;
Ma no fâ comme to fræ
Chi n’hà fæto intixicchî!....
Vegni ûn pö a rimarginâ
Tante ciaghe, e tanto mâ!...
Fatte avanti co-i sacchetti;
E i negozj boin infiæ,
E di guagni sbardellæ
Danne a tûtti.... ti hæ i speggietti
Ammïa ben cose ti fæ?
No stâ a fâ figgi e figgiastri
Regallando a to caprizio
A chi Sioule, e a chi Pollastri!
Ma fà e cose con giûdizio,
Semmo tûtti to figgiêu,
No scordâ o juste miliêu,
Dunque andiemo in preçipizio!
Se ti g’hæ qualche segretto,
Qualche balsamo, o qualch’erba
Pe astallâ a Gente sûperba,
Arvi presto o tò vazetto ...
Dà ûn pö ûn bello vomitivo
Ai Avari e ai Uzuräj
Per levâghe adosso i diäj
Reggittando argento vivo!...
E dà un forte astrengitivo
A Chi spende e spande troppo;
Favorisci ûn pö de scioppo
Pe-a memoja ai Debitoî,
E pe-a flemma ai Creditoî;
A Chi traffega dà ûn scropolo
(Peizo giusto) d’êujo vergine,
E a Chi vende, a doze triplica;
Dà de bonn-e pilloe indoæ
Ciù de drento che de fêua
A Chi manca de scaggiêua!...
Fà trionfâ sempre a Veitæ,
L’Innocenza, co-a Virtù,
O Talento e l'Equitæ;
A Calunnia tegnî zù,
Smascherando l’Impostûa,
E ... no vêuggio dî de ciù,
Dunque vaddo fêua mezûa,
Che o restante, a senso mæ,
Ti hæ quattr’êuggi e ti o veddiæ.
Paxe, ûnion, concordia porta,
Intra presto e serra a porta
Perchè n’intre de maottie,
Tifi, miasmi, epidemie,
Sorve tûtto quello mâ
Chi ne fè tanto sospiâ!!!
Tegni lonxi ogni malanno,
Che se posse tûtto l'anno
Sotto o Regno do Trentêutto
In salûte sempre stâ,
Ben provvisti de beschëutto
Imbarcâse, e navegâ
Con bon vento e senza puia,
In bonn'ægue sempre andâ,
E a bon porto ritornâ
Prosperosi e in allegria,
Che Dio vêuggie, e coscì sia:
Ghe veddiemo . . . . scignoria.
