Piaggio M. - Poesie 1846/Prefazioîn e Reviste da Çittæ/1822
| ←Prefazion, Anno 1821 | Prefazioîn e Reviste da Çittæ de Prefazion, Anno 1822 |
Prefazion, Anno 1823→ |
| (ediçion Pagan - 1846) |
*
O Vintûn o l’è passôu
E lê ascì presto o s’è infiôu,
O l’ha fæto poco reo,
O l’è stæto ûn anno critico
Pe-o commercio, e pe-o politico,
Ma se pêu cantâ o Teddeo,
Perchè a-o temporale fæto
Poco mâ da noî gh’è stæto;
Gh’emmo avûo ûn pö de baixin
Ma per bacco ciù ûn pittin
Se metteiva a dilûviâ,
Ma passò tanta burasca
Con piggiâ o pægua per fâ
L’esercizio ä Ponçeveasca:
Ringraziemmone o Segnô
Stemmo tûtti in paxe, e amô,
E sciallemmose in pensâ
Che in quest’anno fortûnôu
Unn’annâ doggia ghe sä,
E ingrasciemo a bon mercôu.
Senza tanti Microscopj,
Cannocciali e Telescopj,
Mondi nêuvi, Camere ottiche,
Scriti Vegi, Carte gottiche,
Senza tiâ tanti spaghetti,
Senza méttime i speggetti
Veddo cæa co-i êuggi nûi,
Che o nêuv’anno Vintiduî,
O fä reo comme de duî,
E guagniemo di gren scûi.
S’ha da fâ di affari in grande,
Capitiä da tûtte e bande
Navi, cäri, mercanzie,
Commiscioîn, træte, avarie;
I dinæ devan corrî
Comme l’ægua; ha da vegnî
Gran nostrâ, e foestê zù abbrettio,
No saviän ciù dove méttio,
E mangiemo grosso o pan
Comme a coppoa de Caignan.
No stæ a cianze, Granattin,
Vegniä o vostro San Martin;
Se aoa guägna in to mestê
I Sensæ e i Magazzinê,
Quando meno ghe pensieì
Presto o tardi v’appattieì:
Vegniâ l’Anno (de San Bin)
Che ne o faeì mangiâ piccin.
Ha da nasce chì, e in Rivëa
(Se no càmoa, e se no zëa)
Oive e agrûmmi ciù che fêugge,
Con e coffe i han da acchêugge;
L’êujo a sguasso manezziemo
Che frizziemo, e poi scûggiemo,
Torte a uffo ha da mangiâ
E fûgasse chi n’aviä.
O quant’ûga ha da sciortî!
Che vendegne! e che bon vin!
(Se no ven burrasche e o coin)
Finn-a i pozzi s’ha da impî,
Per despëto o regalliän
Solo a quelli che o paghiän.
Ma sciccomme o beìvio sccetto
O pêu fâ cattivo effetto,
Coscì prego i Vinaçê
A no voeì guastâ o mestê,
E co-a solita caitæ
De tempeâlo per meitæ.
A Campagna, se ciûviä
A so tempi, e o Sô lûxiä,
E se sempre aviä o Villan
Pippa in stacca, e sappa in man
A rendiä de tûtto ben,
Faxêu, fave, frûta, fen,
Articiocche, poisci, piæ,
Funzi, e sûcche in quantitæ,
I Manenti s’inricchiän,
I Fattoî no mincionniän,
E paghiän forse a-o Patron,
Senza cianze o criâ, a pixon.
Un Inverno döçe aviemo,
Se sä freido s’ascädiemo,
Primmaveja bella scioïa,
Stæ ben cäda, e brûstolïa,
Un Autûnno ûn pö sezioso,
Ma se ciêuve o sä ciûvoso.
Veddo poi, se no m’inganno ,
Che quest’anno o sä ûn çert’anno
Carestioso pe-i Dottoî,
E pe-i Meghi; non aviemo
Mai de mâ, nè litighiemo,
De salûte emmo da moî,
No vorriæ, che capitasse
(Che a sæ cosa affæto strana)
Un pittin de Freve giana,
No so allöa comme a s’andasse!
Basta gh’emmo a Sanitæ
Ch’a l’ha i êuggi spalanchæ,
Stemmo dunque in allegria
Se a vegniä, a mandiemo via.
Oh che bella prospettiva,
Che presenta l’anno nêuvo!
Abbondanza in tûtto scrêuvo
Guägni, scûi, salûte, evviva!....
Cose gh’ælo là? ûnn’Armâ!...
Ah! ... son figgie da majâ:
Zovenotti destrighæve,
Se n’eì coæ presto majæve ,
Perchè dunque se aspëtieì
Ciù ûnn-a figgia no trovieì,
Che in quest’anno , o belle o brûtte
Se porriän, se maiän tûtte.
Chi finiscio, ma do resto,
Cai Amixi, me protesto,
Che de quante cose ho dito,
E de quello, che ho predito,
No so ninte de segûo.
Quello poi che v'assegûo
Che o mæ Esopo che ho promisso
Fâ sciortî l’anno passôu
Ma che a causa do pastisso,
E do tempo costippôu,
Sempre in casa o se n’è stæto;
O sciortiä presto in veitæ,
Un feriolo anzi gh’o fæto,
Boîn Stivæ, Cappello, e Pægua,
Per repâse o freido e l’ægua,
E chi sa quelle bughæ,
Che ciù d’ûn ghe deve tiâ
Quello giorno, che o sciortiä,
De quæ son quaexi segûo,
E con questo ve salûo.