Piaggio M. - Poesie 1846/Esopo Zeneize/O Villan e a Vigna
| ←L'Aze e o Cavallo | Esopo Zeneize de O Villan e a Vigna |
A Carrossa→ |
FOA LXXV.
O VILLAN E A VIGNA.
Unn-a Vigna spessa e bella ,
De vea razza moscatella,
A dixeiva là in Frevâ
A ûn Villan chi a voeiva poâ:
Ommin cao, caccia ûn pö vïa
Quella brûtta to messuïa
Chi me causa tûtti i anni
Tante penn-e e tanti affanni
Con levâme i mæ figgiêu;
E per cose ti me vêu
In quest’anno torna peâ?...
Fa o piaxeì, lascime stâ,
Che in Settembre, t’assegûo,
E per bacco! anzi te o zûo,
Vêuggio fâte vegnî pinn-e
Fin all’orlo tûtte e tinn-e.
Ghe prestò fede o Villan,
Se levò presto d’in man
A messuïa, e lasciò stâ
Tûtte e ramme senza poâ.
In quell’anno, a dî a veitæ,
Vendegnò dell’ûga assæ,
E o fè do famoso vin,
Ma ne-i anni che vegnìn
E no g’ha posciûo ciù acchêuggie
Che di cavi e de gren fêuggie.
Bezêugna a tempo e a lêugo
Castigâ i so figgiêu,
Perchè a troppo iniûlgenza
Pregiûdicâli a pêu.