Piaggio M. - Poesie 1846/Esopo Zeneize/O Moscon

by Martin Piaggio

←L'Erboo d'Amandoa e l'Erboo de Figo

Esopo Zeneize de Martin Piaggio O Moscon

I dui Vegi→

FOA XXIX.

O MOSCON.

O Moscon, chi no pêu stâ
Senza sempre mogognâ,
E ch’o taxe solo quando
O ch’o dorme, o sta mangiando,
Unn-a votta che ciûveiva,
O s’andò presto a assostâ
Da ûn Cocchetto chi tesceiva,
Con sorpreiza o stava a miâ
Quelli belli fî de sæa
Gianca, giana, pinn-a e cæa,
L’incantava l’attenzion,
A pazienza, a precision,
E a finezza do lavô,
Poi dä raggia, e da-o brûxô
Pin d’invidia o se n’andò,
E per caxo o se fermò
In t’ûn bosco dove gh’ëa
Unn-a bella e grande avëa,
E cujoso de so fâ
O l’andò con aja grave
Da ûn pertûzo pe aggueitâ
Cose fava dentro e Ave.

O restò mucco e stordïo
Osservandoe travaggiâ
Senza mai piggiâ respïo,
Sempre in moto, andâ, tornâ,
Fabbricâse con maestria,
Megio ancon che ûn inzegnê,

E so case in scimmetria
Mobigliæ de seia e amê.

O scappò mortificôu,
Comme stæto assagoggiôu,
E per stradda o l’affermava
Quanti insetti o l’intoppava
Per dî mâ senza raxon
Co-a so lengua de moscon
E dell’Ava, e do Cocchetto:

O dixeiva, maledetto!
Chi vêu fâ tanta bombæa
Do Cocchetto, e da so sæa!
Gh'è tanti Agni, che san fâ
Con ciù inzegno, e scimmetria,
E ciù finn-a a so tägnâ,
Ma nisciûn manco i ammïa?
No ghe vêu miga talento
Per fâ a sæa comme o Cocchetto,
Finn-a mi, se me ghe metto,
A so tesce in t’ûn momento,
No gh’è merito nisciûn,
Cocchetto e Agno son tûtt’ûn:

Dove a l’è, forte o sbraggiava,
Tanta abilitæ dell’Ava?
O so inzegno? i so lavoî?
A l’è laddra de mestê,
A l’arröba o sûgo a-e scioî,
E a ne fabbrica l’amê!...

Ne conoscio mi ûn spavento
Ciù inzegnose, e de talento,
Solo a Vespa ve çittiö,
E tant’atre ne taxiö:

Gh’è lavô megio finïo?
Ciù ben fæto e delicôu?
E ciù bello do so nïo?...
No, ma tanto o n’è stimmôu!
Ciù segûo fâlo se pêu
Per tegnîghe i so figgiêu?
No, ma pù pe ûn pö d’amê
Lödan l’Ava ciù che lê!
O l’è zêugo de fortûnn-a,
Ava e Vespa son tûtt’ûnn-a.

Tûtti quelli, che o sentìn
Dall’invidia e da-o venin
Coscì ingiûsto raxonnâ,
Per non stâ lì a litigâ,
Ghe dixeivan, ti hæ raxon,
Contraddite no se pêu,
Ma poi dentro in to so coêu,
Oh che birbo de Moscon!

Quando ûn Ommo è conosciûo
Pe invidioso e maldicente,
Se o ve löda, o n’è creddûo,
O ve fa do mâ co-a gente;
Se o ne dixe incangio mâ,
Ben per voî, lasciælo fâ.