Piaggio M. - Poesie 1846/Esopo Zeneize/A Vorpe e o Crovo
| ←O Cacciôu e o Luvo | Esopo Zeneize de A Vorpe e o Crovo |
O Zûgôu→ |
FOA LXXX.
Oh comme ti è mai bello,
(Dixeiva a Vorpe ûn giorno
A ûn Crovettin novello
Chi ghe giava d’intorno,
Poi fermo in sc’ûnn-a rocca
Con do formaggio in bocca):
Che bella ciûmma möa!
Che sampe! che sûffetto!
Longa e sûperba cöa!
Grande e maestoso aspetto!
Perfetto proprio in tûtto!
Ma che peccôu!... ti è mûtto.
O Crovo insûperbiva
In sentîse adûlâ,
Ma troppo o ghe pativa
Sentindose ciammâ
Per mûtto!... o cacciò ûn sbraggio,
E ghe scappò o formaggio,
Che a Vorpe vëgia lesta
Sûbito a se piggiò:
Oxello senza testa
(Bûrlandolo a sbraggiò),
Quanto te costa caa
Un pö de lode !... impaa.
