Piaggio M. - Poesie 1846/Esopo Zeneize/A Pegoa e o Spinon
| ←O Gallo, a Vorpe e o Can | Esopo Zeneize de A Pegoa e o Spinon |
A Sigaa trovâ co-i Grilli→ |
A PEGOA E O SPINON.
Unn-a burrasca orribile
Con ægua, lampi e troîn,
Gragnêua comme i briccocali
Se levò ûnn-a mattin;
Scappava ûnn-a Pegoetta
Pe-i boschi criando bæ,
Despersa da-e compagne,
Che ä stalla ëan camminæ;
« Ferma, (ghe criò ûn Spinon)
« Intra in ta mæ casetta,
« Chì drento no ghe ciêuve,
« Vegni, bella Pegoetta.
A gh’intra a semplicetta,
Ma appenn-a intrâ, a se sente
Punze e streppâ a pellissa
Da quello impertinente,
Che terminâ a burrasca,
E voendosene andâ,
A sciortì sccioindo sangue,
E quæxi tûtta peâ.
Figgie, ammiæ
Ben dove andæ,
Quanti lêughi co-a magagna!
Chi va a casa no se bagna.
