Piaggio M. - Poesie 1846/Esopo Zeneize/A Lûmassa
| ←O Prinçipe e o Roscignêu | Esopo Zeneize de A Lûmassa |
O Figgiêu e o Spëgio→ |
FOA LV.
Senza aveì famiggia e amixi,
Sempre in casa de nemixi,
Con nisciûn mai contrattâ ,
Solo a lê sempre pensâ,
Stà serrâ comme in prexon,
Avanzâse da-o barcon
Per fâ e corne a-i so vexin,
Sciortî sempre d’arescoso
Quando o tempo è burrascoso,
Passaggiâ adaxo e ciannin
Con portâse apprêuvo tûtto,
Lasciâ o segno da per tûtto,
Voeì levâse tûtte e vêuggie,
Roziggiando pommi e fêuggie,
E inciastrando e megio scioî,
A l’erbetta fâ gran guæra,
Andâ a pasce sotto tæra
I so scandalosi amoî,
E scciûppâ poi da-o magon;
Fæto o giûsto paragon,
Poca differenza passa
Da ûn Egoista a ûnn- a Lûmassa.
