Piaggio M. - Poesie 1846/Esopo Zeneize/A Feliçitæ

by Martin Piaggio

←O Spëgio da Veitæ

Esopo Zeneize de Martin Piaggio A Feliçitæ

A Farfalla→

FOA LI.

A FELIÇITÆ

Prologo.

Unn-a votta a Madonnava
Aa Mammà a ghe raccontava,
Che gh’ëa ûn chi pregò Giove,
(Ma no so ciù quando e dove)
D’insegnâghe per caitæ
A trovâ presto a manëa
De poeì batte a stradda vëa
Pe arrivâ ä Feliçitæ.

Barba Giove l'exaudì,
E a-o momento ghe spedì
Quella Dea chi è trasparente
E d’Apollo ciù lûxente,
Bella senza vanitæ,
Che a se nomina a Veitæ:

Va (o ghe disse) da quell’ ommo,
Co-i to lûmmi dagghe aggiûtto,
Fallo ben virtuoso in tûtto,
Sccetto, onesto e galantommo,
E coscì ti gh’insegniæ
A trovâ a Feliçitæ.

A Veitæ presto a l’andò
Da quell’ommo in casa so,
A ghe stè per qualche giorno,
Poi a Giove a fè ritorno,
E a ghe disse : « Sommo Dio,
« I comandi to ho eseguïo,
« Ma son stæta inûtilmente
« Da chi è sordo, e no me sente,
« Cose diggo o no capisce,
« Cose vêuggio o n’eseguisce,
« O vêu fâ cose o vêu Lê,
« Onde son tornâ chi in Çê. »

Giove ghe a fè torna andâ
Co-a Raxon accompagnâ,
Perchè questa a s’intendesse
Con Lê megio, e a o persuadesse,
E d’accordo co-a Veitæ
I difetti ghe levassan,
E a vëa stradda gh’insegnassan
Pe arrivâ a Feliçitæ;

Da quell’ommo ritornòn,
Ma a brassetto o ritrovòn
A ûn so amigo sviscerôu
Di ciù antighi, o ciù zelante,
E o compagno ciù costante,
Che Amô-proprio o l’è ciammôu,

Primmogenito diletto
Dell Egoismo maledetto.

Questo bravo compagnon,
Quando o vidde intrâ a Raxon
Co-a Veitæ streite abbrassæ,
O criò forte e mäveggiôu
All’amigo zà guägnôu:
« Comm’a l’è sta novitæ?....
« Cose vêuan queste Matronn-e?
« Son vegnûe a fâ da padronn-e?
« Chi a l’è questa Sciâ Raxon?
« Cos’a l’ha da fâ con ti?....
« Son to amigo, ghe son mi
« Che son sempre a to raxon!....
« E a Veitæ ch’a vadde via,
« Che no a vêuggio in compagnia!...

Quest’imperioso linguaggio
O l’annichilò o coraggio
Da Raxon e da Veitæ,
Che se son presto intannæ,
Consolandose fra lô;

Ma frattanto o Proprio Amô,
Fac totum diventôu,
Alter ego dicciarôu,
Dominante, padroniscimo
De quell’ommo acciecatiscimo,
In te tûtto o comandava,
Prepotente o strepitava,
O trinciava, o divideiva,
Ogni dûbbio o decideiva
Senza mai bezêugno aveì
De Dottoî, nè de Procuoeì,

Senza stâ a senti e lamente,
Nè e raxoîn dell’innocente,
Tûtto Insomma, o ben, o mâ
De so testa o voeiva fâ,
Coscicchè a Veitæ e a Raxon
Desgûstæ, angosciæ, irritæ,
Perchè nûlle diventæ,
Torna in Çê se ne scappòn,
E quell’ommo abbandonôu
All’Egoismo o moî despeôu
Con lasciâ di gren dinæ!....

Dov’a l’è a Feliçitæ
Dunque, allöa disci ä Mammà,
Che quell’ommo o riçercava ?...
A rispose: « O no se sa!
Ma me disse a Madonnava:

Figgio cäo, mi te rispondo
No ghe n’è feliçi a-o mondo;
Se qualcûn forse te o pâ,
Se ti o poësci drento ammiâ,
Ti o veddiësci lacerôu
Da-i rimorsci, e sfortûnôu:
Quelli che te pän feliçi
Son pe-o ciù sempre infeliçi,
Perchè a vëa Feliçitæ
A n’è miga in te Ricchesse,
Ne-i Onori, e Dignitæ,
Ne-i Talenti, e in te Bellesse;
Ma nell’ëse giûsti e boîn,
E ne-o fâ de belle azioîn;
Quella poi chi è ciù perfetta
Ne-a Conscienza, se a l’è netta.

No me l’ho mai ciû scordâ
Questa bella conclûxion,
Coscì a vêuggio anchêu stampâ
A serviâ d’introdûzion,
E per Prologo a-e mæ Foette:

Permetteime che ghe a mette,
Che a propoxito a me pâ ,
Coscì e vaddo a prinçipiâ.