 |
Questa pagina a no l'è stæta corretta. | |
PER RO SEMEGIANTISSIMO RETRÆTO
DRO SERENISSIMO DUXE
GIAMBATISTA CANGIAXO
fæto dall'eççellente pittô ro signor
ANGELO BANCHERI
Scolaro dro Çelebre Signor Pompeo Battoni.
SONETTO
Dro nostro inclito Duxe lezeran,
À caratteri d'Oro registræ,
Re virtù tante e rære qualitæ,
Ri secoli, che ascosi ancora stan.
Poi parlando tra lô, se lagneran
De n'avei visto questa bella etæ
Dell'Oro, e de non êssese trovæ
A veiro in Trono con ro Scettro in man.
Bravo Banchê, Voi moddo avei trovao
Con Pennelli eççellenti e bon corô
De réndero à ro mondo eternizao.
E ri posteri nostri con stupô,
Perchè l'avei sì ben delineao,
Comme ro vimmo noî, ro viran lô.
DI MICRILBO TERMOPILATIDE P. A.
