 |
Questa pagina a no l'è stæta corretta. | |
Lettera dro Sig.r Giambattista figgio dro Sig.r Crispin Maria Garello
Sig.r caro, e Patron esquisitissimo
Caro sció Alberto tutto dose, e amabile,
Vuoi ve ne sté li a Nervi in Pavarinna
Piggiandov'ogni spatio imaginabile.
Non sò cose pensé, s'o cuoe addovinna,
N'oré che vuoi ve dessi a fá l'astrolegico,
Mirando se ra Lunna è meza, ò pinna.
Che s'a fá ve mettei vuoi questo prolico,
Son desperoù, Bacciccia vatt'a piggia,
Ch'a guagnane o n'ha ciù argomento logico;
Perchè dra lunna i ponti s'o s'appiggia
Ad osservá l'humó vostro lunatico,
Ri vostri amixi van zù pe ra liggia.
Pre amó dro Cé, no ve fé tanto prattico
De sto pianeta i ponti andá osservando,
Che troppo riuscirei bon mattematico.
Se vuoi tá studio sté gueri menando,
Ve spinzerà ra curiosité
De savei d'atre stelle, o comm'e quando.
Andando vuoi a sercá ste cose té,
Orei savei quando a lasciva Venere
Se conzonze con Marte a fá frité.
