 |
Questa pagina a no l'è stæta corretta. | |
Per servixo de camera l'è puoe
Prattica in tutto quello, chi se vuoe,
Per mett'in letto pre acconzá ra testa,
Accommodá a ri pizzi ri frexetti,
A ri ciminipisti, e cagnoretti
Non se puoé trová Donna pari a questa.
In destende con gratia ro rossetto,
Incrastá sciù ra pelle ro gianchetto;
E qua se vuoeggie spetiá a n'imbrigna
In savei distillá l'egua de pigna.
L'è puoe stupenda in manezá l'agoggia
In fá ro pointo buso,
Non za comme quarch'un chi ro stroffoggia,
Lavorando a caviggia,
L'è ciù, che non se dixe,
Lé sa taggiá, e megio fá i solin
A l'ha ancora bon taggio in tre camixe,
De grixelle, e orexin
Fera pu lavorá,
Ch'in sciù ra feta fin
Ri pugni con doe muoen ghe virei fá.
Mi a me cresce in tre muoen,
Da puoé ro sò trattá, ro so bon terme,
Unna votta l'ho vista a marasperme.
Lé ve sa fá re cerimonie a reo,
Che pá ch'a l'haggie in corpo un Galateo,
Vossignoria non sa,
Che questa Donna a l'ha
Unna cosa, chi n'ha Donna chi vive,
A no sa leze ninte, ma a sa scrive.
