Con bestia grossa vorenté s'imbarca,
E vuoi ghe sarei parso de mesura;

Che s'eri in tempo la dro patriarca,
Tra ri azeni ciù grossi haveivi cura
De conservá ra spetie d'in tre l'arca.


A ro Sig.r Pero Durazzo
Peruggia


Lustrissimo Patron, Sig.r Compá,
Ogni di se me drissa ro pensiero,
Chi me dix'heto visto ro scio Pero,
Ma ro Sig.r Compá muoé no compá.

L'è troppo duro in somma l'aspetá
De mi, ch'a vuoi son servitó da vero,
Tanto grand'è ra penna che soffero,
Che m'è vegnuo in desgroù fin l'oxellá.

Godo però, che vuoi, e vostro fré
Vene stagghé con ro divin'aggiutto
In giolito, e perfetta sanité.

Ra Comá v'arregorda sorvatutto,
Ch'avertí ben ch'in brutto no pesché,
Ch'anderessi a Peruggia puoe dro tutto.