Ch'hei donca piggioù bazo ben descerno,
Se pensando piggiá ra via dro Cé,
Quella larga hei piggioù, chi va all'inferno.


A ro Sig.r Giacomo Lerexo


Sig. Giacomo Lerexo vuoi comme
L'erexo appointo, sodo ve mostré,
E giusto comme l'erexo porté
Verde il vigor sotto le bianche chiome.

Re bonne frute puoe de sto cognomme,
Per vuoi son giusto cibbi approprié;
Ma puoe questo cognomme ve staré,
Sciù re spalle ciù ben che sciù ro nomme.

Noi, per confá ciù re prerogative,
Non che Giacomo Lerexo ciamave,
Ma sció Antogno Orofuoeggio oggemmo dive.

Puoe comme bon Poeta e non da rave,
Ma comme i pari vostri in queste rive,
Oggemmo d'oro fuoeggio incoronave.


A ro Sig.r Gio: Giacomo Cavallo passoù da ra cansellaria dro magistrato de guerra a re colonne de S. Zorzo.


Generoso Cavallo oura m'accorzo,
Perchè un Cavallo, comme vuoi bizzaro,