 |
Questa pagina a no l'è stæta corretta. | |
Sûnetto.
Addio, Grondann-e, addio!.... Vatte a negâ,
Stillicidio de Zena giastemmôu!
Che per fâte da-i teiti disertâ,
Me ghe son per dex’anni spolmonôu;
Addio!.... coscì porriö ûn pö passeggiâ,
Lûxindo o Sô, senz’ëse ciù bagnôu;
Addio!.... porriö coscì o pægua serrâ,
Finïo de ciêuve, e doppo aveì nevôu;
Addio!.... che sotto i toæ ciù no passiö,
Tante mostre de fêua veddiö retiæ,
Nè a-e bûtteghe all’orbetto ciù accattiö;
Addio Peschee, Barchî, Fontann-e!.... andæ
Passa o tempo, v’aggueito, e ve scorriö
Fin tanto che no seì tûtte scentæ.
