 |
Questa pagina a no l'è stæta corretta. | |
Sûnetto.
Son tant’anni che a sûcca me lambicco,
Che bricchi no ghe son da-o Bracco a Becco
Per staccâ, e per mandâ e Grondann-e a picco,
E perchè reste i nostri teiti a secco;
Ghe schitto addosso comme ûn massabecco,
Ghe sciacco ogni pittin, picco e repicco,
Ma quando creddo d’aveì paggia in becco,
Piggio scacco; e da-i nicci no e busticco;
Verghêugna!... e l’è poscibile per bacco!
Che ûnn-a Çittæ de coscì gran reciocco
A vêuggie soffrî sempre questo smacco!
Basta, per mi ghe strenzo ancon ciù o blocco,
Se no scentan ghe schisso ûn atro attacco
Dove ghe pensan meno, e te ghe a ciocco;
Ne fasso ûn gran malocco
Prinçipiando dä stradda de San Lûcco,
E stacco, e stecco, e sticco, e stocco, e stûcco.
