 |
Questa pagina a no l'è stæta corretta. | |
Ohiboibò! che brûtto vizio
O l’è quello de piggiâ
Giorno e nêutte do tabacco,
De giasciâne, e de pippâ;
Per ûn ommo, o primmo, o l’ûltimo,
O l’è ûn vizio ancon passabile,
Ma ne-a donna o primmo solo
O l’è ûn vizio insopportabile.
Sciä no piggie ciù tabacco,
Ghe l’ho dito, sciâ Zabælla,
Perchè dunque o sò nasetto
O diventa ûnn-a nasælla.
Comme fa mai brûtto vedde
Unn-a donna ben montâ
Ogni pö frûgâse in stacca,
Arvî a scàtoa, e tabaccâ,
E sentîse dî da quelli,
Che pe o ciù son malegrazie,
Sciä Lûcrezia, sciä me daiva
Unn-a preiza de sò grazie?
