 |
Questa pagina a no l'è stæta corretta. | |
Levâ a-e donne o cappellin,
Ve battezzan pe ûn beghin!...
Ohiboibò!... caregatûe,
Pregiûdizii, ostentazioîn
Bandii da-e villezzatûe
Dove regna o vëo gran ton!
Ciù ûn pö diggo Irreligion!!...
Miæ, che bella libertæ!
Semmo tanto illûminæ,
Che m’attasto se ghe son!
E se v’ho da dî a veitæ,
Fra i lûmmoîn, lûmmi e lûmmetti
Da-i quæ semmo circondæ,
N’ho mai visto a tempi mæ
Tanta gente co-i speggetti,
Pâ che regne a Cecitæ!...
Ma no femmo digrescioîn;
Quando ven quelle funzioîn,
Ne-i villezzi sospiræ,
Santi, Morti e San Martin
(Giorni vei carnevaleschi!)
Allöa scì che se sta freschi!....
Chi de famme moî no vêu,
Ne passâ pe ûn pöchettin,
Appaèggiâ deve i raviêu,
Preparâ di boîn cappoîn,
Pesci, caccia e do bon vin!...
Per dâ a quelli commensali
Che no son stæti invitæ,
Ma che càpitan puntuali,
Stæ segûi, no dûbitæ,
E precisamente all’öa
De pregâ pe-i morti... a töa!!
