 |
Questa pagina a no l'è stæta corretta. | |
De beschêutto ben guernïo,
Un rosbiffe, duî bonnetti,
Pin de triffoli e oxelletti,
Un nasello zà bugïo;
Un’enorme çimma pinn-a,
E ûnn-a torta pasqualinn-a,
C’ûnn-a cassarolla grossa
Con do gran tocco de rosto,
Che fù tûtto misso a posto,
In sciä scocca da carrossa,
E ligôu bello pulito
Da-o Scignor T-O-to-Pulito!
No vegniva, e l’ëa nêuv’öe,
Mai nisciûnn-a de Scignöe,
Mugognava i Carossê,
E s’accabbanava o Çê,
Nè lûxiva ciù de Sô,
Se vegnì de mal ûmô!....
Tûtt’assemme capitò
Quella möa cö parasô;
Don Grighêu cö saccanò
E ûn salamme per baston;
A Sciä Cilla in convulscion,
Perchè in casa a se o scordò,
Ma a l’aveiva a banderetta;
A Poetessa in dominò
C’ûn assazzo de scuffietta;
E a Sposâ coscì piccinn-a
C’ûnn-a grande cappellinn-a
Chi a croviva tûtta a rëo,
Che a me paiva ûn funzo vëo;
L’atra per crovî i difetti
In gran vello con speggetti
