 |
Questa pagina a no l'è stæta corretta. | |
549
Là gh’è ûn pä de Bänse giûste,
Ah se e poëse ûn pö portâ
Dove ghe son scarse e frûste!
No ghe saiva miga mâ?
Quelli là son duî Naselli
Sempre freschi, là i Binelli,
Chi gh’è a Vergine co-a Crava,
Lasciù gh’è e braghe do Poin,
Chi o tettin da Madonnava....
Donne cäe, quanto cammin
Ho mai fæto d’assettôu!. ...
O Zodiaco ho zà passôu,
Ma se ho ancon da vedde e stelle,
Ghe lasciö vista e parpelle,
Che a contâle per menûo
Ghe vêu ûn secolo segûo.
L’è ciù megio che adaxetto
Torno a-o mondo cö ballon,
Me proviö a trovâ o segretto
De poeì dâghe a direzion
Che se çerca orizzontale,
Diventiö coscì immortale.
Ma com’æla?.... là a Levante
Se gh’è fæto coscì brûtto!
Spunta a Lûnn-a c’ûn tûrbante
Pin de fêugo da per tûtto,
A l’ha averto i magazzin
Da gragnêua, di lampi e troîn!....
Scappa scappa, andiö a Ponente.
Ma là ûn sciäto se ghe sente,
E gh’è all’aja çerte striscie
Con treì coî che me pän biscie,
