 |
Questa pagina a no l'è stæta corretta. | |
Scandalose pe-i Foestê ....
Finalmente ho sentïo dî
Da ûn chi ha letto zà o pappê
Che son stæte condannæ
Fra sett’anni a doveì moî,
E ancon primma, se n’han coæ.
O l’è ûn abbaco longhetto,
Ma l’è megio andâ adaxetto,
Che corrî pe andâ ciù sen,
E pe fâ e cose ciù ben;
Coscicchè (se no neghemmo
Ne-o frattempo, o no creppemmo)
Se veddiä levôu d’in scena
Dä sûperba nostra Zena
Questo Cholera Teitonico,
Questo Stillicidio Cronico,
Perchè poco in armonia
Co-e bellezze da Çittæ:
Viva chi i ha condannæ!
Chi pe-o primmo e mandiä via!
Ma fin tanto che no veddo
Mette ponti, mi no creddo,
Perchè han troppo protettoî
E rincresce a tûtti o moî,
Cioè, per dîla in bon zeneize,
A-i Padroin de fâ de speize,
D’arvî a cascia gh’han erlïa....
Che se fûsse per accresce
E pixioîn, no ghe rincresce,
Saeivan pronti... scignoria.
