 |
Questa pagina a no l'è stæta corretta. | |
No guägno ninte, o ghe rispose allöa,
Ma o fasso per demöa,
Me ghe cincio, o l’è o mæ divertimento,
E meschinn-a! o te a sciacca lì a-o momento.
Poæ de famiggia, ammiæ d’invigilâ
Che i vostri figgi, quando son piccin,
No se divertan de scorrî e ammassâ
E bestie per demöa , manco i moscin,
Dunque cresciän c’ûn coêu da maxellâ,
E a tûtte e cose vorriän vedde a fin:
Quanti exempj vedemmo tûtti i giorni
De questi brûxaboschi e perdigiorni!
O CAVALLO E O PORCO.
Gh’ëa ûn Porchetto — in t’ûn villaggio,
Chi no sciortiva — mai d’in to staggio;
O no pensava — che a ben mangiâ,
Beive e dormî, — grûgnî e rûmmâ.
In poco tempo — o vegnì grasso,
Che a stento o poeiva— fâ qualche passo;
Ma con levâse — tûtte e so coæ,
O s’annojava — ne-a moscitæ.
In quello stato — tristo e indolente
O l’invidiava — e dava mente
A ûn poveo bestia — de Cavallin,
Chi rebellava — seia e mattin
