 |
Questa pagina a no l'è stæta corretta. | |
Oh voî gente majâ, piggiæ argomento
Da queste porte, quando rattellæ
Mai ciù a finieì, se tûtti dui sbraggiæ;
Voî, donne, castighæ a lenguetta affiâ,
Comme a porta tegnî a bocca serrâ,
Lasciæ ben sbatte l’atra, se taxieì
A se serriä lê ascì, coscì a finieì.
A raggia a l'è ûn vapô, che remennôu
O fa lampo, ma o mêue se soffocôu.
FOA LXXVIII.
O Cavallo do cäro de Giûnon,
O figgio d’Argo, vêuggio dî o Pavon,
Inarcandose a cöa,
Façendo da scignöa,
O disse a ûn Roscignêu chi o stava a miâ:
Ebben, cose te pâ?
Ti hæ mai visto da mæ ciûmme ciù belle
Lûxenti comme e stelle,
Fæte d’argento e d’öu, ricche de tanti
Rûbin, smeraldi, zàffiri e diamanti?
Chi ælo chi no stûpisce
Ammïando e mæ bellesse?
E chi no sbalordisce
In vedde insemme ûnïe tante ricchesse?
Oh poveo Roscignêu, gamba sottî!
Ti è ben da compatî!
