 |
Questa pagina a no l'è stæta corretta. | |
FOA LXXVI.
Sentî che sciato da lonxi ven!
Gente, retiæve, stæ in guardia ben!
Oh quanta pûa! chi s’avvixinn-a?...
Unn-a Carrossa! comm’a camminn-a!
Quattro belliscimi cavalli a tïan,
Ricco equipaggio, tûtti l’ammïan;
Gente, fæ röso, pronte a-o salûo,
Chè drento ûn Prinçipe gh’è de segûo...
Passa a Carrossa, s’accosta ognûn
Pe ammiâghe drento... no gh’è nisciûn!
Quanti fan sciato pe-a borsa grossa,
Ma a testa vêua comme a Carrossa.
FOA LXXVII.
Se levò ûn giorno ûn vento coscì forte
Che in t’ûnn-a stanza o spalancò due porte,
E quæ sbatteivan con fâ tanto sciato,
Che distûrbavan tûtto o vexinato;
E picca... e pesta... e sbatti... finalmente
Unn-a restò serrâ; ciù non se sente
Sciato nisciûn, sebben sciûsciasse o vento.
