 |
Questa pagina a no l'è stæta corretta. | |
Me spetta ascì a segonda
Per drito, e per doveì,
O drito do ciù forte,
Ve o diggo se nö seì;
A terza poi pretendo
Pe-o grande eroe che son;
Chi ardisce toccâ a quarta
Me o mangio in t’ûn boccon.
Coscì succede a-o mondo
A-i ommi, che imprûdenti
Çercan d’imbarassâse
Co-i forti e prepotenti.
Unn-a Çerva scappando da-i chen
A s’ascose de sotto a ûn angeôu;
Ghe passòn ben vixin, no a veddèn,
Lê a stè cuccia, tegnindose o sciôu;
Ma imposcibile a veddila l’ëa
Pe-e gren fêuggie, che favan spallëa.
Quando fùn lonxi assæ, ghe passò
Tanta fuffa , a se misse a guastâ
Tûtta a vigna, e scoverta a restò;
I Caccioeì, che sentìn remesciâ,
E veddendoa da lonxi ghe tiòn
Unn-a botta de scciêuppo, e a piggiòn.
