 |
Questa pagina a no l'è stæta corretta. | |
11
Mille soccorsi ha avûo a povea gente;
In tutti i sei quartê somministravan
Gran roba e di dinæ, se l'eì in mente,
Di lenseû, de coverte scì ghe davan,
E se trovava ancon l'impertinente,
Che o dixeiva che ninte regallavan.
Cessæ, o infami lingue, de parlâ,
E imprendeì un-na votta a rispettâ.
12
Che dixesci che o l'ëa un gran spavento
Per o popolo afflïto e desolôu.
Se veddeivan i Prævi a ægua e a vento
Con o Segnô, e ciû s'è inspaximôu
A gente a quello scimile tormento.
Ma son cöse che han sempre onorôu
Vedde chirurghi e meghi camminâ,
E tutti se prestavan pe aggiûttâ.
13
Doppo questo m’affermo de parlâve
Do castigo de Dio che gh’é pû stæto.
Non poemo, o Çittadin, che ben lodâve
Di soccorsi pietosi che n’eì dæto,
E semmo tutti pronti a ringraziâve
De tutte quelle grazie che n’eì fæto:
O Liguri Patrizj, ve meitæ
D’ëse per omnia sæcula lodæ.
Parrucchiere.
