 |
Questa pagina a no l'è stæta corretta. | |
Lontan lontan de monti ûnn-a cadenn-a
de pin e de castagni popolâ,
che a se destende a mëzo çerciò in mâ,
con çimme cö da çenne sorve a schenn-a:
poi collinn-e, poi fiori e ûnn-a serenn-a
aja de primavera profûmâ,
e barchette chi sorca l’aegua sâ,
e ûn presepio de paixi in sce l’arenn-a.
Da vigile lanterna l’orgogliosa
çimma a se leva là, comme reginn-a
de l’onda placidiscima e tranquilla,
che ne l’ombra da neûtte silenziosa,
arzandose gîgante in sce a marinn-a,
a segna a-e genti a patria do Balilla.
Nell’erbetta,
Fra a viovetta
E camelie e o giassemin,
Ti, rêusetta
Graziosetta,
Ti ê a reginn-a do giardin!
Riçercâ,
Adorâ
Da-i fantin e da-e zitelle,
Ti, rêusetta
Graziosetta,
Ti ê a reginn-a de ciù belle!
Innaffiâ,
Coltivâ
Sempre da ûnn-a man graziosa,
O rêusetta
Graziosetta,
Ti ê ûnn-a cosa ben preziosa!
