 |
Questa pagina a no l'è stæta corretta. | |
Lë de tûtto a ghe sa fâ,
Lëze, scrive, cuxinâ,
Cûxì a röba, lavâ i piatti,
Fâ de braghe e atri ravatti....
E a l’ha ancon discreta etae,
Quarant’êutto anni passae....
A l’è forse.... ma per bacco,
Voeî na preisa de tabacco?
Mille grazie e.... (in confidenza)
Sciä l’avieva a preferenza....
Comme â ciamman?
Fortûnin,
Bello nomme, sciö Tognin!
Bello proprio.... ma per credde
No-a porrieva dunque vedde?
A sta là in t’ûn carroggetto,
Sciä se tacche chi a brassetto.
O stella mattutinn-a, tûtta grazia e splendô,
che ti brilli in oriente primma che o sciorte o sô;
o stella mattutinn-a, che ti guiddi o mae viaggio,
seggie a tûtti benefico o têu celeste raggio.
E quando, ne-e tempeste da vitta lagrimâ,
franze i mauxi in ti schêuggi e o fa fracasso o mâ,
o stella mattutinn-a, soave ed amorosa,
veggia sorva chi navega comme ûnn-a moâe pietosa.
O tremolante, mistica perla do firmamento,
chi miandote solo no pêu restâ contento?
Chi no te manda ûn baxo, o bella, doçe e pia,
quando all’alba de rêuse sêunna l’Ave Maria?
O stella mattutinn-a, fra tûtte prediletta,
immacolata e pûra da-a man de Dio concetta,
posse in ti chi sospîa trovâ sempre ûn conforto
e per ti a mae barchetta presto razzonze o porto!
