 |
Questa pagina a no l'è stæta corretta. | |
Piggia da-o maxellâ ûnn-a bonn-a fetta
De bêu, azzunzighe insemme duî cappoin,
Roba da poeì fà o tòcco a-i macaroin,
Diverse costiggêue, testa în cascetta,
Xiambon, salammo, ûn pö de säsisetta,
Duî berodi, e di intingoli ciû boin,
Amaretti, beschêutti, e atri bomboin,
Vin bon da poeî levâseghe a berretta.
E tûtto porta a casa a tò moggê
Che, secondo l’ûsanza de famiggie,
De dâghe a consa a se ne intriga lë.
A töa procûa d’aveîghe i mascci ë figgie,
A nonna, se a l’è viva, cö messé,
E vêua ciû che ti pêu de gren bottigie.
Oh bon giorno, sciö Tognin
E com’aela stamattin?
Attechì! mi ve salûo,
Non v’aveiva conosciûo:
Za, seî ben, sendo bûscetto,
Manca a vista.
Meschinetto!
E a quest’oa za per Savonn-a?
Ho da vedde ûnn-a personn-a
Che, figûaeve, a m’ha da dâ....
Sciä se fasse allöa pagâ,
Ma sciä vadde ben tappôu
Che a-e montagne ghe nevôu,
Benchè osciâ sciä seggie ardïo,
Porte, drito e regaggio.
Stamattin voî me burlûe....
No, protesto in mae veitae
Che de vista sciä sta ben:
