 |
Questa pagina a no l'è stæta corretta. | |
Se gïa e se regïa drento o letto,
Mentre o pançin o litiga co-a schenn-a,
E a bocca, maeducâ, pe’ fa ûn scherzetto
Se slarga in to bagiâ da perde a goenn-a.
Inûtile çercâ de fala taxe,
E e lerfe ben serrâ perchè a no bage:
Convegne avei pazienza e in santa paxe
Vedde a famme corrî lungo e miage
Dante a Ugolin gh’à daeto ûn arçivesco
Da rezûggiâ famelico in eterno:
A mi bastiae ’na micca de pan fresco
Pe’ poei sciortî de butto da st’inferno.
Con sti stiamenti a mensonâ o pan fresco
Ingordo me creddiei, e me ne pento:
Ciû ûmile me fiò de san Françesco
Dixendo che siäe bon anche relento.
(Canson)
I
A i tempi mae, da zoveno,
vêu dî tant’anni fà,
sotto i barcoin da bella
s’ûzàva de cantâ.
Un o cantava a-a Giûlia,
ûn âtro a-a sêu Rusin,
stunando in sce-a chitâra,
grattando o mandolin.
E drin, drin, drin....
Affaccite, Rosin!
E drin, drin, drà....
No fâme disperâ!
