 |
Questa pagina a no l'è stæta corretta. | |
Sciâ l'è impaziente de piggiala in brasso,
De däghe dôi baxin!... ma sciâ l’aspete,
Finiscio de fasciala e poi ghe a passo,
Cosci sciâ se estaxià de sêu graziete....
Va, poponinn-a, va con quest’ommasso,
Se o no te piggia ûn po’ no l’ha ciû quete!
Ho a morte drento a-o chêu mentre te rio
Cercando consolate, o mae piccinn-a,
E l’êuggio têu me fissa, e o no indovinn-a
Che t’ho promisso tanto e t’ho mentio.
Te parlo d’avvegnî mentre te spio
Do mä i progressi lenti in ta faccinn-a,
Bella comme ûn pomin che za o declinn-a
A-a prim’arba da citta appenn-a sciôïo.
« Vegnià presto, sta primma co’ i sêu fiöri
E ti d’in letto ti porriae stà sciû;
Ti repiggiae e têu forze, i têu cölöri
Tnsemme a tûtto o brio da zöventû.... ».
E ti ti creddi!... Scì, vegnian i fiöri,
Ma ti, purtroppo, ti no ghe siae ciû!...
Ti n’è morta, per mi, povia piccinn-a,
E o mae pensiero no te pêu scordâ;
Davanti a-i êuggi ho sempre a têu faccinn-a,
Da i biondi rissolin incornixâ.
Te veddo sorridente in ta scoffinn-a
Drento a-a cûnetta rêusa recamâ,
E fresca e bella quando zoveixinn-a
Sciortimo insemme a-a festa a passeggiâ.
Te veddo in to lettin, scimile a ûn giglio
Scciantôu da l’oragan in to fiorî,
E d’êse vivo ancon me meraviglio,
Tanto ho sofferto da no pöeilo dî.
