 |
Questa pagina a no l'è stæta corretta. | |
Amûggia de bigetti ûn bello motto,
I mezzi non importan, nè o mestë:
Un äse da dinè l’è ciû d’ûn dotto,
E dell’onöre futtite o panë.
Con sto scistema ti viviae ben visto,
Magari decoröu con quarche croxe,
Ma ti no te sarviae da-o giörno tristo,
Che, in mezo a quattro töe, ti vagghi a-a Foxe.
— Comme t’è grasso e gianco, cào zanetto
e ch’eleganza, poi, che purtamento:
t’è redditôu de serto ghe scommetto,
perchè no ingrascia, no, chi vive a stento. —
— Anchêu se vive ben a fà a turtagna
e i êuggi a no serrà davanti a biava:
mi ingrascio e sciallo a-e spalle da castagna
e ti ti vivi magro co-a têu fava...! —
Trei ratti s’ëan cacce in t’en gran furmaggio
— ’Na furma de stravegiu parmexan —
E a resûggiä s’éan missi cun curaggio
Cumme se a famme avessan de ’n villan.
Senza aveighe ûn bell’a d’inzegneria,
Senza do minatü cunusce l’arte,
Coi denti t'han scavou ’na galleria,
Che a furma a trapassava parte a parte.
O furmaggià, però, in t’en bello giurno,
O l’ha scuverto a cosa e o l’ha pensöu
Quell’inzegnê levaseli d’inturno
E ûn rataiêu in te ’n canto l’ha tesöu.
I ratti, manco a dilo, nastûzzando,
Se sun lasciè da-a trappula acciapâ
E stavan cun terrure rûminando
A-a fin ch’o i destinava o furmaggià.
