 |
Questa pagina a no l'è stæta corretta. | |
A gente, se sa ben, a l’è ûn po’ nescia,
Se lascia imbibinâ de parolluin....
Famme a barba, Gustin, ho tanta sprescia....
Che sun de tiate, in fundo, de curdin.
Mi, per esempio, me sun za persuaso,
Vagghe Orlando o Calandra a-o ministero....
Gustin, Gustin, ti m’insavunn-i o naso!...
O no se prugrediâ de mezo zero.
Tanto pezo, allantua, pe-a borghesia....
Ammïa, Gustin, che ti me taggi o mento....
E pezo ancun de ciû pe-a monarchia
Se no se trêuva ûn ornmo in parlamento.
Intremmo in te ’n momento decisivo,
E stemmo per andâ tûtti in malüa:
Con questo movimento sovversivo
A va a finî.... Che ti me taggi a güa!
Mae pöae me diva un giorno: O mondo intrego
L’è comme ûnn-a gran corsa a-o precipizio:
Da-a bunn-a donna a man ne passa a-o cëgo
E a morte a ven ciû fito che o giûdizio.
Zûghemmo tûtta a vitta a-o primo sato
E chi ghe dà de scciappe o resta sötta:
Ma i fûrbi, che san fä da lengua e sciato,
A casa mai no van cö-a testa rötta,
O perno da question: mettise in vista,
Piggiä ûn contegno adatto a circostanza,
Tegnî cö prêve e asci cö söcialista.
E l'ideale aveilo drento ä pansa.
A pansa, tegnî a mente, a lé ûn santuario
A-o qua e no se fa offerte de parolle:
Davanti a ûn piatto bun o a ûn bun salaïo,
I ciû diventan, cäo, di braghemolle.
