 |
Questa pagina a no l'è stæta corretta. | |
O mae Gnaognin o l’è un gattin noello,
Tûtto graziëte e lesto comme ûn fuin,
O cüre, o säta apprêuvo a ûn remescello
E o-u fà ballä franiezo a-i sò saampin.
Quando o me vegne in scöso, sto frascöso,
M’i invita a caressalo co-e sûcchae,
O me se fretta, o rönfa, o fà o graziöso,
O scherza cön de finte mordiggiae....
L’ätro giorno a mae biondinn-a,
Biricchinn-a,
Da-o barcön a m’ha salûöu
E, co-a bella so magninn-a,
Gianca e finn-a,
Unn-a rêusa a m’ha cacciöu.
Ma ûn figgioame, che o passava
E o scigöava,
Vista a rêusa o l’ha acciappä,
Poi, andando sciû a-o barcön,
Sto birbön,
« Marameo » o s’è misso a fä.
Non vorrendo avei ûn scacco
Da ûn macacco,
G’ho sûnnöu ûnn-a mascä
E, in to mentre che triönfante
A-a galante
Stavo a rêusa pe mosträ,
Quello figgio d’ûn gran trêuggio.
In t’ûn êuggio
’Nn-a tomata o m’ha sbrivöu....
Son restöu cömme Pinella
E a mae bella
O barcön a l’ha seröu....
