 |
Questa pagina a no l'è stæta corretta. | |
O cangio o l’è ’na specie de bäsiga,
Che a va sciû e zû segundo i bullettin.
L’è ûn punto anchêu, duman a l’è ’na riga,
E ûn franco ve diventa dûi cittin.
Cun questo cangio a l’è 'na gran fatiga
Saveì cose se tegne in to bursin:
O dollaro, da ghêubbo, o balla a giga
E ne despêuggia tûtti cian cianin.
Pe rimediaghe dixan de prudûe,
De limitase a l’estero a catta;
Pruvè però a cattave due verdûe
E o cangio ve sentièi za rinfaccià,
Perchè e leitûghe in ciassa sun vegnûe
Da l’isula di laddri da ligà.
T’è letto, Michelin, in to giurnale
A scuverta de quello prufessù?
Scangiandote ’na gandua interstiziale
O te rimette a nêuvo senza dù.
De ’n vegio ne fa un zueuo tale e quale,
Forte, arzillo, ardente de vigù,
’Na cosa cuscì survlanatûrale
Cumme se a lûnn-a a diventesse o sù.
Vèi seia, doppo senn-a, ciaciarando,
Ho infurmôu da cosa me muggè,
A què m’ha dito riendo: — Cao Fernando,
Sun balle che me fan durmì d’in pè! —
E mi te gh'ho risiposto de rimando:
— Sun balle scì, però de scimpanzè! —
