 |
Questa pagina a no l'è stæta corretta. | |
O tempo cumme i môuxi tûtto scciann-a,
Ma ben de rëo o scciann-a a nostra frunte,
Anzi, co’ lungo andà, cumme a gingiann-a,
Ghe scava do dulure e funde imprunte.
Zûghemmo da nui stessi a-o nostro inganno,
S'impimmo de superbia e d’ignuranza,
Semmo di scciavi e a femmo da tiranno,
Ma tûtt’in fundo a l’è questiun de pansa.
O stêumego o l’è proprio ’na cadenn-a,
E a morte o nostro grosso spaventaggio;
A vitta ne trasfurman ’nte ’na penn-a
E a libertè ne cangian in servaggio.
O tempo o passa fito, cumme un fiato,
E a povia carne nostra a va a marsì,
Cun a vixun de un giorno meno ingrato,
Che sempre o l’ha purtroppo da vegnì.
Ce giuro pendavvei, sciò delegato,
che a queste cose no ci ho voccassione;
ce posso dire, nun ho mai robato
se proprio non valeva l'occaxione.
L’anello d’oro? Sci, me l’han trovato
ascoso nella foddra del gippone;
ma quello me l’avveiveno prestato
per fare un po’ de sblaga nel veglione.
In quanto poi al bursettin de raso,
non c’era drento manco un franco scasso,
se ce leva el mandillo dello naso.
De questi furti qui io non ne fasso,
sciò delegato, e non lo diggo a caso,
perchè no rendan ninte e fan fracasso.
