 |
Questa pagina a no l'è stæta corretta. | |
O boschi profûmè, pin de frescûa,
De canti d’oxelletti e de rien,
Ottobre, maedûcou, ve desfigûa
B ve despêuggia pezo di villen.
O freido ve fa cazze e belle fêugge,
Che ve faxeivan tanto reserchè,
In gran muinelli o vento se l’inghêugge
E ne semenn-a i campi e e carezzè.
In to së grixo e vostre ramine nûe
Me pân brasse de gente despëà,
Ch’a cianze in gran silenzio e sêu creatûe,
E o ben do qué l’è steta despêuggià.
Fra poco a neive co’ i pizzetti gianchi
Pe-o lungo inverno ve vegnià a cruvì;
Posève, o boschi, da-o travaggio stanchi,
A ve turnià sta Primma a reverdì.
Novembre dorve e porte dell’inverno
E a votte l’è ’n inverno antisipou:
O porta o grisantemo e o sempiterno
Pe’ o giurno ai nostri morti destinou.
O giurno cûrto fa parei ciù bella
A veggia accanto a stiva co’ a famiggia;
Tra quarche zêugo e 'na meza ratella
O sêgo o ghe sta ben de 'na buttiggia.
O vin o l’è ben pezo do cuntaggio;
Se beive pe’ na nascita o ’na morte,
Se beive pe’ brinda, pe’ fa coraggio,
Se beive cun a bunn-a o a gramma sorte.
O vin, che in ca se beive in cumpagnia,
O l’è fra tûtti i vin o ciû tranquillo;
O descia o bun amù cun l’allegria
E o mette drente e venn-e un po’ d’arzillo.
