o ne insì ëgoa in grande abudancia[sic], si che n'avem tuti asai da beive per lor e per le lor bestie. E lo nostro Segnor Dee fo irao contra de Moizes perchè o non onorà lo so nome davanti a li figij d'Issael e ge disse: "Tu non menerai quello pövo in la terra che ò promisso a lo pastó Abram, Izach e Jacob". E quello lögo è ihamao Mon e è lögo de contradiciom per la felonia de li figij d'Issael chi intentàm lo nostro Segnor Dee.


Chì se contèm como li figij d'Issael conbantèm com Amalach e como e' zem a lo monte Sion.

Or in quello, quelli de Amalech vègnem e si conbatèm con li figij d'Issael. E Moizes disse a Ioxoè chi era so söxoro: "Va e serni IIII M omi armai e va contra Amalech".

E Ioxoè ze e pigià quella soa gente e ze contra Amalech. E Aron se movè con atri omi e ze in cima de una montagna.

Or Ioxoè incomenssà la batagia con Amalech e Moizes tegniva la man ásá a sé co la verga, e fava oraciom a lo nostro Segnor Dee per li figij d'Issael: e quando Moizes tegniva la man ásá a sé, Joxuè si venseiva, e quando o l'asbasava, Amalech si avansava. Or le maim (e) e brasse de Moizes eram pezente[sic] e si non le poiva tegní in ato a la soa vorentë, e Aron com sexe omi, trei da l'um brasso e trei da l'atro, si lo ássávam su in ato e sostegnevamlo[sic] piaschu da la soa banda, e per questa via non increseiva a Moizes a tegní le soe maim ate fim a lo stramon de lo sol.

E cossì Ioxuè venssè Amaleth.

Pöa lo nostro Segnor Dee disse a Moizes: "[Scrivi] in um libero, che ò destruto lo nome e la remenbranssa de Amalech per la man de Ioxuè de sorva la terra".

E Moizes disse a li figij d'Issael: "Cantai alegramenti a lo Segnó che la soa man a conbatuto[sic] contra Amalech".

E ihamà quello lögo Prea de Fortessa. E questo fo in lo terso meize che li figij d'Issael insìm de Egito, e in quello iorno vègnem sanai.

E pöa Moizes montà in la cima de lo monte, e lo nostro Segnor Dee disse a Moizes: "E ti Moizè dirai a la caza de Iacob e a li figij d'Issael: «Voi mesmi avei visto so che ò faito a li figij de li Egicem[sic] e como e' v'ò trëto de Egito com mam forte, e inpersò voi odirei la mea voxe e oserverei li mé comandamenti, e sarei pövo recto e beneiti sorve tuti li pövi chi saram in terra, e sarei beneiti in lo mé nome, saserdoti e gente santa.» E queste som le parolle chi ti dirai a li figij d'Issael".

Alaora Moizes deseize zu de lo monte e avizà tuto lo pövo e dege a intende so che lo nostro Segnor Dee ge avea dicto. E quando ello ge ave dicto so, tuti a una voxe criàm: "Noi faremo tuto so che lo nostro Segnor Dee a comandao".

E pöa Moizes tornà a lo nostro Segnor Dee e dissege la responciom de lo pövo, e lo nostro Segnor Dee disse: "Aora e' veirei una novera sorve lo pövo, e si me odiràm parlá conteigo, e creiram per tuto tenpo".

Disse lo nostro Segnor Dee a Moizes: "Va a lo pövo e santiffichalo anchöi e deman, e fa che elli lavem tute lo lor vestimente".

E Moizes ze a lo pövo e dissege: "Seai aparegiai a lo terso jorno a la matim, chè e' desenderà lo nostro Segnor Dee in lo monte Sinai a vista de tuta gente".

E asignà terme intorno lo monte, cossì como lo nostro Segnor Dee ge avea comandao, e dissege che nissum tochasse ni montasse sum lo monte, persochè tuti quelli chi so tacassem[sic] ni ge montassem saream morti, e cossì le bestie com li homi e tute quelle cosse chi tochassem lo monte. E quando o vègne lo terso iorno che l'arba se ihëra e' vim lo bruxó de li troin e lo respendir de li lanpi e la grande sprendura de le nivore chi crovivam tuto lo monte, e le tronbe e tronbete favam si grande la bruda che tuto lo pövo chi era in l'oste avem grande poira e zem inver lo nostro Segnor Dee lì apè de lo monte Sinai, e lo monte si fumava a modo de una fornaxa, si che tuto lo pövo era spaventozo, e lo som de le tronbe andava ogni jorno cressando.

Alaora Moizes se aparegià per andá a reseive lo nostro Segnor Dee, e montà sum la cima de lo monte. E quando o ge fo, lo nostro Segnor Dee disse a Moizes: "Moizes, avanti che ti faci atro, va a sconzurà lo pövo e dige che non passem lo terme che ti g'ai mostrao".

Disse Moizes: "Segnó, lo pövo non porà montá sum lo monte chi te g'ë deveao e de non fá contra li töi comandamenti, e si me comandasti che elli